葵涌：部門縱容 回收車變「錶霸」
「呢兩架回收車佔用咗咪錶位都有三、四年，基本上係年中無休，佢哋一見到警察嚟就會即刻入錶，警方都冇晒辦法。」駕駛人士陳先生指出，葵涌大隴街有回收車長期佔用咪錶位，經營回收生意，阻礙其他駕駛者使用泊位之餘，亦令附近環境衞生惡劣。陳先生曾向政府不同部門投訴，惟各個部門均互相卸責，以致問題至今仍未解決。
警半年發568告票
警方發言人表示，非常重視有關情況，在今年五月至十月，共接獲五十五宗有關上址的汽車阻塞及違泊投訴，並發出五百六十八張定額罰款告票，警方會繼續監察該處的違泊情況及果斷執法。
「政府部門成日都縱容佢哋，搞到佢哋由兩架車變四架車，都唔知遲啲會唔會霸晒所有咪錶位。」陳要求有關部門積極研究改善方法，並加強巡邏及執法，嚴厲打擊「錶霸」。