「不患寡而患不均，不患貧而患不安。」傳統智慧係無錯嘅，今時今日嘅香港，貧富懸殊日益嚴重，市民生活擔驚受怕，既不均亦不安，諗落都幾悲哀！
呢，有機構調查亞太區三十三個已發展城市嘅生活滿意度，一百分為滿分，結果香港以六十一點八分，僅次於新加坡排名第二。呢個結果表面睇唔錯，但其實只係表面風光，內裏陰乾。事關港人除咗對工作同財務前景稍為滿意，其餘就業前景、個人生活滿意度以及人身安全等方面嘅得分，都唔係咁理想，特別係人身安全，更加由上次調查嘅六十五點四分大跌至唔夠六十分，都咪話唔得人驚。
講真，出現呢個結果，一啲都唔出奇。新加坡近年專心謀發展，人人安居樂業，反觀香港，家嘈屋閉，內鬥內耗，搞到一事無成，試問搵咩同人比吖？仲有喎，香港向來以全球最安全城市自居，家陣居然要擔心人身安全，真係講出嚟都冇人信。
可惜吖，事實擺在眼前，唔到你唔信。都市炸彈遍地呢筆唔講嘞，唔係冧樹就係冧招牌，再唔係就飲有毒鉛水，食品安全事故頻生，市民健康毫無保障。近年社會愈來愈政治化，部分人郁吓就抗爭，郁吓就衝擊，佔領、鳩嗚、光復……沒有最激，只有更激，有人陰謀製造炸彈，有人甚至喺立法會外引爆垃圾桶，搞到成個香港戰場咁款，你知喇，沙塵滾滾最易殺錯良民，市民又點可能有安全感吖！
最慘係屋漏偏逢連夜雨，除咗呢班唯恐天下不亂嘅攪屎棍，最近有腐敗警察同黑幫「打龍通」，從非洲以及南亞地區招攬所謂酷刑聲請逗留嘅假難民，「三毒合流」，組成破壞本港法治嘅新鐵三角。假難民膽正命平，姦淫擄掠無惡不作，已經反轉成個香港咁滯，再咁落去，香港容乜易變成第二個伊拉克o架！
話時話，現實世界不安全，網絡世界同樣係風聲鶴唳。網絡欺凌大行其道，部分鍵盤戰士橫行霸道，唯我獨尊，人肉大起底已經係小兒科，只要對方政見不合又或者睇唔順眼，即時喺網上喊打喊殺。除咗惡人，網上世界同樣盛產騙子。警方數字顯示，今年頭三季關於網上「裸聊」嘅個案比去年同期大增五成，話口未完，最近又有人中招，慘遭恐嚇勒索。當然唔少得仲有無日無之嘅電話詐騙案，都唔知幾多人受騙上當！
美國前總統羅斯福著名嘅「四大自由」，其中一個就係免於恐懼嘅自由，估唔到竟然成為香港人遙不可及嘅夢想，唔怪得愈來愈多人用腳投票，遠走他方啦！