政情：原居民帶路 葉劉遊屏山
立法會議員葉劉淑儀（葉劉）最近入咗元朗屏山參觀，仲同油麻地京士柏候任區議員鄧銘心等人影咗一張大合照。事關鄧銘心爸爸松叔係葉劉任職入境處時嘅下屬，亦都係元朗原居民。選舉期間，葉劉多次為鄧銘心站台，所以鄧銘心當選後，梗要請葉劉到鄉下睇睇兼品嘗傳統美食喇！
參觀宗祠擦餐勁
葉劉話，此行最驚喜係參觀鄧氏宗祠，仲食咗菜式特別嘅「九大簋」，包括燉陳皮鴨湯、白水烏頭、了酸豬手及炸鮮門鯤魚等等。葉劉話，當日當然亦見到著名時裝設計師鄧達智，仲有好多入境處嘅舊同事，特登來祝賀松叔個女當選。油尖旺區議員楊子熙都有去。
葉劉仲話，聽聞附近有本港首條文物徑「屏山文物徑」，徑上有香港唯一的古塔聚星樓、多個老圍村及宗廟，佢計劃日後同街坊一齊遊覽喎！咁有興致，葉劉不妨幫手推動吓本地遊吖！