政情：打字機「出土」 陳克勤留影
立法會議員陳克勤與漁農界議員何俊賢（高佬賢）尋日到位於三門仔嘅魚類批發市場，與漁護署開會商討早前出現大量死魚問題，竟然意外發現「出土文物」。高佬賢更馬上幫克勤影相「存證」，克勤就拿拿聲擺上社交網站。大家咪諗多咗，講緊嘅「出土文物」只係打字機啫！
憶起苦練打字往事
克勤話，嗰部打字機係政府公物，依然運作良好。講到打字機，就勾起克勤當年上暑期打字班嘅回憶。克勤話，當年學嘅時候係想有一技傍身，起碼可以搵到文員工作，屋企人仲用八百元購入一部手提式打字機畀佢練習之用。
佢笑稱打字好辛苦，事關想打得清晰就必須夠大力，同依家嘅鍵盤可以輕鬆「求其打」係兩回事。科技發展迅速，睇嚟當年克勤辛苦學習嘅技能已無用武之地，不過換來難忘嘅回憶都係值得嘅！
（互聯網）