政情：建制內訌 北區亂龍
新一屆區議會明年一月正式埋位，首次會議將會選埋嘅區議會正、副主席，更係各個政黨必爭之地。早前我哋預告過北區戰情，指民建聯（民記）劉國勳有意「升呢」做副主席，但戰況不斷升溫，外傳劉國勳原來劍指主席寶座，欲挑戰現任主席蘇西智。上水鄉事委員會主席侯志強亦不甘寂寞，似乎有意加入戰事。民記今次不但要平息內亂，仲要提防鄉紳漁人得利喎！
區選結束至今逾一個月，建制之間爭奪正、副主席噪音不斷，甚至有傳新界鄉紳不惜「勾結」泛民推倒長期壟斷主席嘅民記。其中北區戰況都好激烈，由於蘇西智年事已高，再連任主席四年就年過七十，加上區選一役反映新舊交替呼聲高，民記屬意畀今屆自動當選嘅劉國勳一試，但蘇西智就遲遲唔肯交棒。
侯志強「豬頭骨」論局勢
我哋問過兩位當事人，蘇西智聲稱民記仲未溝通過，但劉國勳就話民記研究緊點樣從內部換血、經驗傳承之間取得平衡，會以北區今後發展為大前提。睇嚟好戲仍在後頭。
不過，手握至少四票嘅鄉事派似乎不甘寂寞。侯志強回應我哋查詢時，意有所指咁講古仔，話有「大黨」自己做阿頭，掟舊豬頭骨出嚟畀「鄉下仔」搶，咁咪即係要鄉下仔打交爭豬頭骨？佢接住話，鄉下有個傻佬唔知死，與其爭食豬頭骨，不如索性爭做阿頭好過。雖然侯志強冇講到明會加入戰局，但係就呼之欲出囉！侯志強寸完民記後，就表明自己只係想「耕田」喎，不過論地區實力，肯定只得侯志強有力競逐喇！
泛民唔夠票坐觀惡鬥
民建聯手握八票，咁鄉紳點樣說服工聯會、泛民等乖乖地交票？侯志強話好多變數，「話唔定一個半個唔歸隊呢？」話中有話，唔知講緊邊個。不過我哋問過部分泛民，佢哋都異口同聲話，區選至今從來冇任何疑似主席候選人向佢哋拉票或者打招呼。北區始終係建制派天下，今次民記同鄉紳之間惡鬥，相信手持四票嘅泛民都係坐埋一邊食花生算喇。