中環出更：新設保監局 又係「公職王」揸莊
政府尋日公布獨立保險業監管局（保監局）首次任命名單，委任有「公職王」之稱嘅鄭慕智為主席，仲有七名非執行董事，包括即將告別議員生涯嘅深水埗區議會主席郭振華，任期由尋日起計三年。保監局為全新嘅保險監管機構，但成員卻不乏舊面孔，唔通香港真係無人肯做公職？
現時負責監管保險公司嘅係保險業監理處（保監處），保監局成立後，明年底將取代保監處，並逐步接管負責監管保險中介人嘅三個自律規管機構。新成立保監局當然係好事，不過新委任嘅主席又係鄭慕智，確係令人冇晒驚喜。
郭振華告別區會有着落
鄭慕智公職百足咁多爪，無論係教育、地產或金融都有佢份，更一度同時擔任七項公職，被質疑違反不能同時擔任六份公職嘅原則。佢亦都擔任唔少上市公司董事。今次再下一城，佢如何分配時間都係一大問題。
至於郭振華於八月份已被委任為回收基金諮詢委員會主席，依家又獲委任為保監局非執董，卸任區議員後都唔怕冇嘢做喇！不過佢係保險從業員，獲委任都算合理，希望佢做得開心啲喇！
卓妮