春江水寒鴨先知，美國啱啱進入加息周期，本港樓市即時腳軟，二手樓業主紛紛減價，大有山雨欲來風滿樓之勢。好明顯，隨着美國加息步伐加快，香港遲早要跟隨，唔止樓市受衝擊，整體經濟亦危危乎。市民究竟點睇呢？「東方報業民意調查」顯示，雖然大部分受訪者認為樓價會下跌，但置業安居仍然係遙不可及嘅夢想，反而如果經濟民生受到加息衝擊，先至係最令人擔心嘅事。
咁又係吖，經過多年飆升，樓價高不可攀，就算稍為回落，仍遠遠超出基層市民負擔能力。早排有調查發現，雖然超過五成受訪者相信未來兩年樓價會下跌，但有近六成人認為自己未來十年只能繼續做無殼蝸牛，講起都幾無奈。最大嘅問題係，樓價跌得少，無殼蝸牛一樣得個睇字；樓價跌得多，又可能重蹈當年遍地負資產嘅慘況，整體經濟受到拖累，大家都無運行。
所以話，要令基層市民有瓦遮頭，始終要諗辦法增加公營房屋供應。可惜吖，當局舊年發表長遠房屋策略，訂下未來十年興建四十八萬個住宅單位嘅目標，點知啱啱過咗一年，就將目標調低兩萬個單位，顯示當局根本無能為力。係人都知，家陣公屋輪候冊申請人數已逼近三十萬大關，三年上樓目標早就淪為空談，當局仲要減少建屋量，上樓只會更加困難咋。
對於建屋目標縮水，當局話係因為統計處推算未來十年住戶數目增長較原先預測少喎，其實大家有眼見，港府拓土建屋阻力重重，家陣搵到嘅土地只夠未來十年興建二十五萬五千個公營房屋，同目標仲有一大段距離，何況萬一部分土地受到司法覆核挑戰，供應隨時買少見少。正如上述民調顯示，大多數受訪者直指政府覓地苦無對策，除咗拖慢公屋流轉，青年置業更係難上加難。
講嚟講去，土地供應一日唔增加，建屋目標只能望梅止渴。當局曾經研究與私人發展商合作興建資助房屋，可惜最後都要被迫放棄，主要咪就係因為搵唔到合適地皮囉。房屋供應短缺，無殼蝸牛望樓興嘆，搞到劏房遍地開花，租金仲不斷創新高添，一個百呎劏房月租就要九千元，問你怕未。唔怪得大部分受訪者批評當局嘅樓市辣招同房屋政策姿勢大於實際，根本無法解決住屋需要。
點講都好喇，美國加息，樓市下跌，整體經濟都唔慌好得去邊。正所謂，居安思危，思則有備，有備無患。香港問題多多，危機四伏，港府究竟有乜應變措施呢？嗱，唔好又等到風暴殺到至「黐膠紙、釘木板」吖！