政情：財爺撐本土 「煥」來反駁
近年本土意識抬頭，「本土」兩字變得好敏感。財政司司長曾俊華（鬍鬚曾）尋日發表網誌，竟然主動撩呢個具爭議性嘅話題，仲用母校喇沙書院同其他中學打劍擊比賽為喻，暗撐本土派，唔通佢都係本土膠？不過行政會議召集人林煥光（WK）尋日出席活動即與鬍鬚曾唱反調，寄語年輕人唔應該太本土，仲批評最近有大專生「勇武抗爭」，兩人似乎隔空搏擊咁喎！
聖誕節閉關撰寫預算案嘅鬍鬚曾，唔知係咪冇街去，悶得滯，尋日發表網誌時諗番佢任教喇沙書院劍擊隊三十年，多年來同拔萃男書院競爭激烈，每當置身舊生圈子，無論係叫口號或者唱校歌，都令佢覺得喇沙仔對學校嗰種近乎狂熱嘅歸屬感，同近年流行嘅所謂「本土」意識有唔少共通之處。
曾拉喇沙仔落水做比喻
鬍鬚曾進一步解釋話，兩者都係對本身身份、傳統和文化有強烈嘅感情和自豪感。佢認為呢種感情和自豪感，可以轉化為一種正面嘅動力，推動每一代喇沙仔願意為母校作出無私貢獻。而呢種感情和自豪感，同時存在於所有香港人之中，對香港深厚嘅情感，同樣可以團結成一股正面、具建設性嘅力量，推動香港變得更好，讓香港整體都能夠得益，而絕對不止於一種封閉式、消極、甚至係具破壞性嘅保護主義。
林：極端思想致原地踏步
不過佢呢種講法，就同特首梁振英今年初譴責本土派搞「光復行動」衝擊內地人嘅語調截然不同。WK出席活動時，一開始仲為鬍鬚曾解畫，認為佢只係有幽默感及感情，講緊嘅「本土」係對學校、球隊、社區以至城市嘅歸屬感。但WK話鋒一轉，就表明立場唔支持年輕人過分本土。佢話，香港人以務實為主，小部分人嘅極端思想唔值得鼓勵，大部分人唔會接受勇武抗爭，擺事實講道理先可以解決矛盾，否則只會原地踏步。政府中人就幫鬍鬚曾補鑊，強調佢唔係支持勇武派或者趕遊客嗰班本土派。