中環出更：高佬賢唔認「包養」女助手
民建聯立法會漁農界議員何俊賢（高佬賢）被翻舊帳！本報近日接獲一封以「滿口謊言何俊賢」為題嘅匿名投訴信，信中力陳高佬賢兩大「罪狀」，包括挪用公帑「包養」當選葵青區議員嘅黨友郭芙蓉；又指佢喺立法會財務委員會二月通過漁業貸款基金撥款時，只顧於辦公室打遊戲機而錯過投票。高佬賢否認上述指控，指覺得無稽同奇怪。
遭匿名投訴打機無投票
投訴人用咗兩頁紙作控訴，其中最大篇幅係指高佬賢申報立法會開支，用來支付聘請郭芙蓉做議員助理嘅人工，又指郭芙蓉後期已經無返立法會及參與漁農界工作，但仍全額支取議員助理工資，即係「包養小花郭芙蓉去準備二○一五年區議會選舉」。此外，投訴人又「揭發」高佬賢於漁業貸款基金投票時，只顧喺辦公室打遊戲機，打算過咗關先去開會，點知錯過咗投票，仲話唔少該黨職員都知道呢件事。
高佬賢接受查詢時指，做助理並非一定要留喺立法會工作，有時外勤或在家都要工作。佢又話，希望繼續聘請郭芙蓉，但對方日後要做全職區議員，可能會改用另一種方式聘請。至於為咗打機而錯過漁業貸款基金撥款投票一事，本報翻查當日投票紀錄，漁業貸款基金撥款係無記名表決，但高佬賢承認無投票，解釋當時全程喺場外拉票，仲有好多人可以幫佢做證。
卓妮