家陣係互聯網時代，亦係資訊爆炸嘅年代，上網成為市民日常生活嘅一部分。奇就奇在港產官僚好似仲生活喺上世紀，乜都落後過人。例如教育局同香港電台共同製作嘅教育電視咁，內容十年如一日，完全冇新意，唔怪得收視率每況愈下。
唔講唔知，原來教育電視已啟播逾四十年，每年製作費高達三千萬元，去年為咗高清化，仲獲當局額外撥款一千萬元添。可惜吖，使咗咁多錢，結果又係得個吉。港台每年製作八十個新嘅教育電視節目，收視率究竟有幾多呢？講出來真係失禮人，每間小學平均收睇五十二點九個節目，中學反應更冷淡，平均收睇五點五個節目，而幼稚園更只收睇三點七個節目咁大把。試諗吓，如果咁嘅收視率出現喺私營電視台，係咪一早要腰斬吖？
唔使問阿貴，教育電視收視慘淡，梗係有問題喇。本報記者隨機訪問幾十名學生家長，大家異口同聲批評教育電視內容過時，太過顯淺，唔能夠配合課程需要。有位小學生家長一語中的，話自己讀書年代已經收睇教育電視，睇完毫無得着，加上內容跟唔上現時課程需要，寧願子女花時間操吓試題好過。有位中學生講得更直接，家陣互聯網又方便又快捷，乜嘢教材都可以搵到，而且免費，仲使乜浪費時間同金錢製作教育電視吖。
最好笑嘅係，教育局冇嗰樣整嗰樣，幾年前學人推出教育電視手機程式，點知反應冷冷清清，推出三年下載次數僅僅過千，部分節目觀看次數不足二十次，完全冇人讚好。記者試用過該程式，短短十五分鐘已出現兩次「彈App」，簡直丟架。
教育電視不合時宜，教育界人士有彈冇讚，點知教育電視發展委員會仲死撐，話節目製作嚴謹，質素亦高，只因新高中制度下課程緊張，「操練文化」令學生難有時間觀看教育電視。教育局亦加把口，指近年學校以數碼光碟及互聯網觀看教育電視節目嘅數字有上升趨勢，唔認為教育電視有問題喎。嗱，呢啲咪就係自欺欺人囉。
冇計嘞，教育局敷衍塞責，而香港電台更一向烏煙瘴氣，兩個部門共同製作教育電視，想唔「有口皆悲」都幾難。正如有位校長話齋，教育電視嘅製作形式追唔上教學趨勢，當局應該諮詢用家，睇吓條路點樣行，而唔係一味閉門造車。咁又係吖，與其每年花費大量公帑製作九唔搭八嘅節目，不如用呢筆錢資助貧苦學生好過喇。
講到底，時代變遷，社會發展，任何政策措施都要與時並進，尤其係呢個網絡年代，如果墨守成規，不思改進，好快被淘汰嘅咋！