中環出更：冇得做監警會 鄭承隆寸郭琳廣
獨立監察警方處理投訴委員會（監警會）委員通常兩年一屆，一般會做足三屆即係六年，但做咗兩屆嘅委員鄭承隆就突然「被分手」，任期到本月三十一日除夕夜就完結。據聞鄭承隆私下同朋友講，自己都好想做落去，對於出師未捷都覺得好無奈。佢尋日出席電台節目訪問時，仲有意無意寸爆監警會主席郭琳廣本身是廣西政協，予人感覺唔舒服，很難繼續做得好。
鄭承隆尋日就被電台節目主持人問及，他同兩屆監警會主席共事過，兩名主席有何分別？佢立即就明寸現任主席郭琳廣：「我哋（監警會）要盡量做到公平，都要畀人睇到公道，市民要求要畀人感覺好公正嘅人先得，我唔係話郭主席唔公道，而係佢本身背景（廣西政協）嘅問題，佢一落嚟坐嗰陣，已畀人感覺唔舒服，好難繼續做得好落去。」
加入中間路線政黨
正所謂一道門關上，另一道門就打開，原來鄭承隆前日已經正式加入由前民主黨成員狄志遠及黃成智等人組成的新思維，佢自稱由建制派走出來，而狄、黃則來自泛民主派，若要走一條中間路線，不能只選擇支持或反對。佢又話，會邀請合作過嘅舊戰友一起加入新思維，還賣廣告指新思維下月七日舉行就職禮；至於會否出戰立法會新界東補選，則有待內部商討。
卓妮