中環出更：爺爺養生法：靠晒林凱章
廣東社團總會、福建社團聯會及香港華僑華人總會三個社團青委，早前首次舉行聖誕聯歡。卓妮見廣東社團總會青委主任林凱章（Victor）及副主任丁志威好好傾，事關Victor係安老事務委員會成員，而身兼黃大仙區議員嘅丁志威，其選區內的長者眾多，兩人梗係好啱傾啦！講開安老，Victor仲大爆有「變形金剛之父」稱號嘅爺爺林亮養生之道，引起眾人爆笑。
咩事咁好笑呢？事關林亮已經九十一歲高齡，卓妮咪問Victor有冇趁機問吓爺爺需要乜嘢安老服務，以便為政府獻策？Victor就好淡定話：「佢仲好後生！」咁又係，林亮好精靈，年輕過好多後生仔。唔知佢有咩養生秘笈呢？點知Victor諗都唔使諗笑笑口爆料話：「咪叫個孫做晒（工作）囉！」真係識講笑。
陳昆外遊曬到面紅
福建社團聯會青委主任林智彬及華僑華人總會青委主席陳昆（Penny）都有到場，未開席，Penny塊面已經紅晒，唔講仲以為佢飲大咗。Penny笑笑口解釋，啱啱同太太去咗馬爾代夫玩，所以曬成咁囉。
香港足球總會董事霍啟山都有到場，啟山話，最近忙於除夕夜在香港舉行嘅省港盃足球賽，當晚原本要同家人食飯，但睇嚟要喺球場同球迷一齊過喇！
廣東社團總會前主席王國強細仔王紹恆（Rex）同女友林靜拍拖到場，問Rex幾時好事近，佢大方話計劃緊喎！
卓妮