政情：新紮爸爸 黃進達無暇換片
新出爐的旅遊業議會主席黃進達（Jason）可謂雙喜臨門，今個月初當選主席後幾日，即升呢做爸爸，重八磅的囝囝好似趕住出世恭喜佢咁。不過Jason就似乎忙唔切，佢自爆囝囝出世兩個禮拜，一直冇時間幫手換尿片同餵奶，亦未搵師傅幫囝囝改名喎！
隨時叫囝囝「承父業」
Jason話，佢哋家族改名要跟族譜，囝囝呢輩要用「光」字，依家起碼知道囝囝中文名叫「黃光×」，但自己就未有時間諗，遲啲先再搵師傅求教。
雖然Jason將改名重任交畀師傅，但佢就堅持囝囝英文名一定係J字頭，即係同自己的英文名Jason字頭一樣。
至於將來會唔會要求囝囝做埋旅遊業，佢呢頭話會畀囝囝咩都試吓，但嗰頭又話可能會學父親黃士心一樣，捉個仔入去旅行社打吓工喎！