政情：新科局長 難展「雄」圖
受泛民拉布影響，立法會前後搞咗三年幾先正式通過成立創新及科技局，間接連累楊偉雄做咗大半年「無薪局長」。楊偉雄尋日趁創科局「滿月」與傳媒午宴時，不點名批評部分議員平日同佢會面就一個樣，但喺立法會發言質詢政府時又變咗另一個樣，對呢種「變臉」神技大感驚奇，對佢嘅情緒管理係好好嘅訓練喎。其實各黨派議員私下講一套、公開講一套嘅「變臉」劇目，幾乎每日都喺立法會上演，楊偉雄咁都覺得驚奇，真係令人替佢同整個創科局擔憂。
搵副手程序「比較樂觀」
楊偉雄又話，早前佢聲言可於兩周內完成委任創科局副局長及政治助理嘅程序，但依家睇嚟有關預測「比較少少樂觀」，但佢否認係人選出問題，而係相關嘅內部程序比佢想像中複雜。其實政府內部程序複雜同官僚根本並非新事物，楊偉雄竟然好似完全唔知情，想唔話佢新兵上陣、入世未深都唔得。
問及如何鼓勵其他政府同事增加應用創新科技，楊偉雄直言新科技「有好亦有壞」，同事要學習如何應付壞嘅部分。佢預告自己會開番個社交媒體帳戶，但暫時唔會公開畀人留言，否則「（收到）幾千個message（訊息）死梗」，唔通呢啲就係佢口中嘅壞部分？開設社交媒體帳戶又唔畀人溝通互動，咁開嚟又有乜意義呢？
早前誤撐Uber急補鑊
講開新科技應用，警方早前大力打擊Uber服務，令到曾經公開大讚Uber嘅楊偉雄畀人翻舊帳。佢尋日重申，Uber喺新加坡有同政府合作，但喺香港嘅營運模式就有違法之嫌，不可相提並論，強調不可先犯法、後修法，建議Uber積極尋求與港府合作。
楊偉雄又提到，香港投放喺創新科技嘅公私營資金比例，現時大約係六比四，佢希望可以逐步調整為四比六，同其他先進城市看齊。可惜喺泛民拉布下，佢嘅任期只係剩番大約一年半，有關「雄」圖偉略，睇嚟好難喺佢任內做到。