聖誕節仲未到，立法會已經休會，版權修訂條例喺一片吵鬧聲中暫時休兵。尊貴嘅議員優哉游哉放假去也，難為立法會烏煙瘴氣，市民睇到都眼冤！
冇誇張o架，立法會拉布成災，近日點人數嘅鐘聲好似魔咒咁縈繞議事堂，連立法會主席都自嘲一番，話議員最少有兩個星期唔使再聽到「催魂鐘」喎。其實，政客不務正業，一味吵吵鬧鬧，依家暫時休會，市民更加樂得耳根清淨喇。話時話，議員受公帑供養，不務正業，有破壞冇建設，自己係咪應該覺得慚愧呢？
好似版權修訂條例咁吖，本來無可厚非，點知反對派政客為反對而反對，為拉布而拉布，搞到滿城風雨。最慘嘅係，拉布唔止導致議會空轉，施政受阻，更搞到成個香港永無寧日。呢，版權條例一連審議咗三日，淨係點人數就有近六十次，合共浪費十幾個小時，簡直匪夷所思。照咁嘅形勢，就算草案喺明年一月復會審議，亦未可樂觀o架，隨時又係跪低都似。當然喇，版權修訂條例搞成咁，港府亦有責任，官僚無能，大事做唔到，小事做唔好，結果咪搞到一鑊泡囉。
政客就識歎嘞，齊齊放假度聖誕，香港就慘咯，施政受阻，發展停滯，想唔死都幾難。正所謂，一節見則百節知，立法會烏煙瘴氣，版權條例受阻只係冰山一角咋。財委會、工務小組及人事編制小組三名主席尋日交代今屆會期三個月來嘅進度，簡直慘不忍睹。工務小組原定審議七十二項合共六百七十五億元工程項目，至今只召開六次會議，通過四個工程項目；人事編制小組原定審議二十四個項目，至今開咗四次會，只通過一個項目咋；財委會仲大鑊，現時仲有十八項議案待審議，而且唔包括高鐵及港珠澳大橋兩個超級惹火項目添。咁搞法，莫講話版權條例寸步難行，所有議題都舉步維艱吖！
家陣經濟民生問題多多，競爭力跌跌不休，本來應該把握光陰，急起直追至係，可惜立法會淪為政治鬥獸場，政客唔添煩添亂已經偷笑。唔係嚇你，美國進入加息周期，隨時影響本港經濟，而內地又自身難保，加上本港旅遊及零售業早已步入寒冬，經濟前景陰霾密布，如果班政客繼續搞風搞雨，香港遲早死路一條嘅咋。
都係嗰句啦，慶父不死，魯難未已。市民想社會穩定，安居樂業，就要用選票踢走班牛鬼蛇神，咁咪唔使再聽到催魂鐘囉。