政情：四點鐘許Sir 交棒「展昭」

許Sir去年三月上任PPRB個位，至今快將兩年。一場佔領令佢出晒名，真係始料未及。警隊見「四點鐘許Sir」咁深入民心，早前推出警隊facebook網頁時，食住條水推出由許Sir卡通公仔主持嘅「四點鐘新聞」，結果點擊率高企首位，可謂人氣爆燈。

區Sir屢破大案立功

許Sir下月七日將調往深水埗警區做指揮官，尋日佢同接任嘅區Sir搞咗個別開生面嘅交接儀式，就係沖奶茶畀傳媒飲，寓意將PPRB過往優良嘅傳統，以及與傳媒同公眾保持嘅良好關係延續落去。

講起區Sir，佢嘅名字展秋與展昭嘅讀音接近，所以人稱「展大俠」。佢出身自警察世家，父親亦是警務人員，修讀犯罪學嘅佢，一九八七年加入警隊，同已故無味神探陳思褀係同期同班，佢大部分時間駐守刑偵部門，屢破大案立功。

二○一三年駐守新界南總區重案組時，區Sir就曾偵破全港最大淫網，由於該網站廿四小時有人把風，守衞相當嚴密，區Sir當年出動飛虎隊破窗入屋，大舉拘捕三十幾人，檢獲嘅三百萬元現金塞滿晒成個夾萬。

爽快應承調任安排

去年區Sir調往港島總區刑事部，同樣要處理佔領行動，幾乎晚晚喺警署瞓覺，之後調去O記負責佔領行動嘅檢控工作。對於接任PPRB總警司，電話肯定響個不停，區Sir話，佢幾星期前聽到管理層要佢接呢個位，佢諗都無諗就應承，不過太太就叫佢將個手提電話擺遠啲喎！