中環出更：「森」痛港大 爭議多排名跌
香港大學近年爭議事件不斷，學生激進嘅行為亦令人擔心校譽受損。港大校長馬斐森前日喺港大校董會發言時承認，港大的排名近年下跌，甚至出現被科技大學爬頭嘅情況，除咗受到計算排名方法改變影響之外，四年前國務院總理李克強到訪港大時，發生學生示威嘅八一八事件亦影響港大聲譽。
盼放下分歧專注發展
近排港大校務委員會風波不斷，由示威者衝擊會議、禁錮校委到主席一職懸空至今，都惹來各界關注同擔心。馬斐森意有所指話，未知最近發生嘅事會唔會影響排名，佢亦批評現時大家太着重邊個做校委會主席，各界應該放下分歧，團結協助港大發展。
雖然馬斐森冇指明咩事，但最近港大校委會連串事件係大新聞，似乎暗示怕會影響「業績」，戴定頭盔先。不過話時話，馬斐森作為港大校長，面對咁大外在壓力及阻力，又有冇承擔做校長嘅責任，盡力維護港大百年校譽呢？馬斐森就聲稱，已經有詳細計劃幫助港大向前走喎！
卓妮