有人話，從政者應該比白紙更白，比清水更清。事實係咪咁？睇吓香港呢班政客咪知道答案囉。
好似工黨立法會議員李卓人咁吖，收受淫賤黎最少一百五十萬元秘密捐款，其中五十萬元「袋住先」長達八個幾月，直到醜聞曝光至交番畀工黨，但期間嘅利息收益就袋袋平安。最離譜嘅係，佢仲死撐只係「好少嘅數」、「無關痛癢」、「唔需要答公眾」喎。你話嘞，呢啲政客究竟係比白紙更白，定係比黑紙更黑吖？
聽吓法律界人士點講喇，金額多少唔係關鍵，最重要係有冇從中得益，如果有就可能構成「公職人員行為失當」罪。冇錯嘞，法律就係法律，貪一元都有罪，何況李卓人涉嫌私吞利息遠遠唔止一元，如果咁都話無關痛癢，乜嘢至有關呢？
正如網民話齋，「袋住先」唔係合理解釋，早前解款車跌錢，執錢嘅市民都係「袋住先」咋，結果咪一樣惹上官非。更有網民指出，偷糖同偷金一樣犯法，有位隧道公司職員執一元，有位阿伯偷三個橙，結果都被告上法庭，李卓人自稱「好少嘅數」，擺明係狡辯。
嗱，群眾眼睛係雪亮嘅。李卓人身為立法會議員，收取政治黑金而冇依例申報，本來已有違規之嫌，醜聞曝光後仲繼續死撐，點止係狡辯，直情係厚顏無恥喇。
所以話，嚴人寬己係反對派政客嘅最大特色，佢哋一向雙重標準，有口話人，冇口話自己。政府官員一有行差踏錯，佢哋一定咬住唔放，喊打喊殺，但輪到自己身有屎，就包庇護短，狼狽為奸。試諗吓，如果收取政治黑金嘅係建制派議員，結果會點呢？唔使問阿貴，反對派政客仲唔借題發揮，上綱上線咩，隨時人頭落地都似。
唔怪得有人話，喺香港只要將自己包裝成「民主鬥士」，嗌幾句政治口號，例如「我要真普選」等等，就等於得到一個保護罩，即使犯法亦可以獲得放生。睇嚟真係冇講錯，咁多年來只有政府官員及建制派議員被迫落台，從來未見到反對派議員因為涉及違法而要上身。好似民主黨議員涂謹申咁吖，當年爆發「匯標」事件，今次又捲入黑金醜聞，結果乜事都冇，問你服未。
講到底，旨意立法會自己人查自己人，根本就係與虎謀皮，要追查黑金真相，清除禍根，始終要靠廉政公署呢把利劍，今次唔好再令人失望喇。當然，「掃帚不到，灰塵照例不會自己跑掉」，立法會烏煙瘴氣，政客狼狽為奸，選民亦有責任，出年就係選舉年，大家最緊要帶眼識人，用選票將牛鬼蛇神掃出議事廳，唔好畀佢哋繼續禍港殃民吖！