政情：葡籍區議員「唔忿氣」
香港中西文化匯萃，今屆區議會選舉，就出現首位葡萄牙籍嘅區議員，講緊嘅係剛在觀塘麗晶選區當選嘅畢東尼（Anthony）。Anthony話，佢祖先係因清朝八國聯軍，由上海逃難來港，自此在港落地生根，社會福利署前署長、融樂會主席余志穩原來係佢表舅父。雖然Anthony雙親都係葡萄牙人，亦係天主教信徒，但屋企好本地化，講廣東話同英文，佢亦係喺香港讀書，土生土長。
不過，講到讀書，Anthony就有啲唔忿氣，原來佢好多表兄弟姊妹，當年都入咗葡人開設嘅港島名校聖若瑟書院，點知佢考極都入唔到，搞到近期書院一百四十周年校慶，個個親戚都有份出席，但只得佢冇得去。祖籍首都里斯本嘅Anthony，其實好多年都冇返鄉下，皆因佢唔識講葡萄牙語，話返到去會被同鄉歧視喎。