立法會議員蔣麗芸（Ann）前日一番「聽精神病病人講得太多嘢，聽聽吓自己都黐線埋」言論，就引來醫學界、社福界、平等機會委員會炮轟，更加連建制派精神科醫生都開口都要求阿Ann為事件道歉。阿Ann原本都死撐，但尋日下午終於在輿論壓力下跪低，強調自己無意歧視任何人，仲話對被冒犯嘅人感抱歉，但就無講會否收回言論。
香港精神科醫學院、香港醫學會、香港醫學專科學院接二連三發出遺憾聲明，批評Ann嘅言論歧視精神病患者及康復者，唔尊重精神科醫護人員，又指其言論不恰當及具侮辱性，加重社會對患者嘅誤解。精神科醫生黃以謙及前勞工界立法會議員潘佩璆亦喺社交網站貼文，指斥阿Ann用「黐線」形容患者嘅病徵不恰當，要求佢立刻道歉。社福界方面，香港社會工作者總工會及香港社會服務聯會都有作出遺憾聲明，而立法會及平機會都話收到有關案件嘅投訴。
阿Ann尋日出席立法會續會時仍然避走拒絕回應事件，但面對輿論壓力，佢下午主動回應，話自己無意歧視任何人，對被冒犯嘅人感抱歉，仲話會去信相關機構解釋，並承諾會為弱勢階層服務。其實卓妮前日問過佢怕唔怕涉及歧視，當時佢話有關理論係一個泛民主派議員同佢講嘅，仲笑笑口話自己冇有怕添，估唔到事隔不足一日就要公開道歉，所以話政治真係一日都嫌長呀！