中環出更：梁繼昌證揩「脂」 疑團未除
立法會上周六發生駭人聽聞嘅枱底藏「屎」案，會計界議員梁繼昌（Kenneth）揩到成褲都係啡色物體。事隔一星期，化驗結果終於出爐，證實Kenneth褲管上嘅係脲甲醛樹脂（Urea Formaldehyde），即係用於黏合木材嘅聚合樹脂。雖然虛驚一場，但就衍生一宗無頭公案，事關未發現任何可疑情況，同時在無進行工程係唔會無故滲漏出脲甲醛樹脂，所以事件仍有疑團未解。
政府化驗所稱無糞味
立法會主席曾鈺成尋日下午交代化驗結果，佢話先後將樣本送往私人化驗所及政府化驗所，結果顯示係排泄物嘅可能性好低，因為種唔到腸內所含嘅細菌，但就驗出含脲甲醛樹脂；而該會議室另一座位嘅相應位置，亦有發現類似啡色物質。
曾鈺成又提到，立法會職員檢取樣本時，曾經用酒精抹過，可能會影響種菌結果，但係政府化驗所並無發現排泄物氣味。
雖然化驗結果顯示係脲甲醛樹脂，但Kenneth仍然一口咬定聞到糞便味道，又話當日用酒精紙巾抹得好乾淨，反指驗到有細菌先出奇。
多名裝修業人士都話，樹脂乾透後一般好難溶解，無可能會揩到成條褲都係，加上立法會大樓落成多年，無可能會未乾，亦無可能會發出臭味。唔知議員日後坐喺會議室開會時，會唔會心慌慌呢？
卓妮