中環出更：奔走百里 捉實議員開會
《二○一四年版權（修訂）條例》拖到尋日終於恢復二讀，吸取上周三流會教訓，商務及經濟發展局局長蘇錦樑（Greg蘇）除咗做「知客」，一連兩日大派雞批、菠蘿包甚至果籃「利誘」議員開會外，為確保有足夠議員在席，更率領多名政務官「狗仔隊」人盯人，更不惜同副局長梁敬國（Godfrey）及政治助理陳百里親自「捉」議員開會，難怪有人笑言陳百里整日為捉人開會奔波，做咗「百里神駒」喇。
雖然Greg蘇一番好意向議員大派雞批、菠蘿包，但人民力量陳偉業（大舊）就引述有建制派議員批評啲雞批「咁cheap嘅！」似乎唔係好受落。
莫乃光「扭計」險釀流會
尋日會議期間，被Greg蘇批評臨陣「轉軚」嘅資訊科技界莫乃光（Charles）唔知係咪懷恨在心，當下午響鐘至約十四分鐘，心急如焚嘅Godfrey拿拿聲拉住Charles，示意叫對方快啲入會議廳，點知Charles寧願喺會議廳外來回踱步，都唔肯就範入內，兩個大男人喺會議廳外拉拉扯扯，好彩新民黨田北辰喺最後七秒倒數從後趕至衝入會議廳，先啱啱好夠人數，齊人一刻已經響鐘十四分五十三秒，差七秒就流會！
除咗Godfrey，前日猛發短訊提醒議員開會嘅Greg蘇亦趁其中一次差約三十秒險告流會之際，走出會議廳外捉議員返去開會。
至於做咗「神駒」嘅陳百里就話，兩星期流會兩次好影響政府同議會形象，來來回回湊人數都係盡力「鼓勵議員開會」喎。議員每月逗糧逾九萬元，開會係議員責任都要官員三催四請，認真諷刺。
唔知係咪因為連日奔波勞碌，Greg蘇自爆已經喉嚨痛兩日，可能因為講嘢太多喎。其實Greg蘇點解唔趁早對外講清楚條例嘅「事實與真相」，咁呢兩日咪唔使講到喉嚨痛啦！
卓妮