特區政府官員最新的民望調查顯示，未計剛上任嘅創科局局長楊偉雄，三司十二局主要官員有多達三分之二，即十人評分下跌，其中三名司長更係全線報跌，外號「好打得」嘅政務司司長林鄭，評分更跌至上任後新低，至於外號「吳得掂」嘅教育局局長吳克儉，評分繼續包尾。
林鄭在處理鉛水事件時強出頭，轟議員要求官員當眾飲鉛水係「屈辱」，並自言「官到無求膽自大」，結果變成「官到無能分自低」；最近多名新界原居民因「套丁」被判囚，林鄭亦被翻舊帳，指佢任發展局局長時曾去信鄉議局，表明私下轉讓丁權唔會被刑事檢控，有誤導原居民之嫌；早前佢被記者追問有關事情，佢一於封口，避開記者提問，睇嚟佢已由「好打得」變成神奇俠女「好閃得」！
一個問責官員，面對群眾，不懂謙卑為何物，狂妄自大，其實正如有人指出，只要稍為懂得天主教或基督教教義的人，都會知道世俗上任何人都帶有原罪，必須謙卑悔疚，到審判日才可獲上主憐憫赦罪，林鄭就好似食咗幾擔蒜頭，竟然斗膽話「天堂已為她留了位」──革命烈士陳天華於《警世錄》開場詩中云：「腥風血雨難為我，好個江山忍送人！」林鄭則是：「鉛水風波難為官，好個天堂留予我！」如此警世狂言，難道「好閃得」，亦是另類華麗轉身？
至於「官到無知排包尾」嘅吳得掂，一個ＴＳＡ操練危機，搞到「飽讀詩書」嘅吳得掂吟詩都吟唔甩，佢發指引給全港小學校監、校長，冀遏ＴＳＡ操練，點知引來兩個校長團體斥其漠視專業，不理解校情，強烈要求同吳得掂對話。吳得掂上次唔得閒出席ＴＳＡ公聽會，有傳佢去咗日本賞紅葉，今次睇怕好難避免唔同校監、校長們對話，相信佢即使靈魂出竅，問非所答，交出肉身，也不至於「尸位素餐」，老朽提早祝佢聖誕快樂！