中環出更：「發仔」送朱古力 幫鄉紳降火
十一個新界原居民及發展商上月捲入「套丁」案，被裁定串謀詐騙罪成，鄉議局事後表明會成立專責小組跟進，尋日趁大會前召開閉門會議，商討上訴細節。據了解，呢個以案件被定罪日子命名嘅「1127」十二人專責小組，至今向村民籌得三百多萬元，初步有意搵專打刑事嘅資深大狀幫手，仲話若無法同政府傾掂數，新界數以千計鄉紳已經磨拳擦掌，隨時同政府打番場咁話。
套丁案上訴 準備「打仗」
鄉議局主席劉業強會後透露，上訴理據包括時任發展局局長林鄭月娥○七年曾去信鄉議局，承諾私下轉讓丁權唔會構成刑事罪，劉業強認為大家對套丁係咪刑事罪行有唔同解讀，希望同當局重開會談。據知專責小組成員仲包括十八鄉鄉事委員會主席梁福元及沙田鄉委會主席莫錦貴等，夠晒牙力。
鄉紳撲水打仗，劉業強新上任亦好識做，趁聖誕節自掏荷包幾萬元買咗成百盒名牌朱古力，送畀鄉紳降火，同多謝佢哋支持爸爸、前鄉議局主席劉皇發（發叔）咁多年，鄉紳都幾受落。我哋仲聽聞，喺醫院休養嘅發叔有望月底前出院，返屋企同家人過一六年添！
卓妮