中環出更：東華院舍開幕 花香撲鼻食指動
東華三院早前獲香港賽馬會撥款擴建旗下香港仔復康中心，一班董事局成員趁開幕禮齊齊參觀擴建咗嘅展誠日間活動中心及宿舍，包括陶藝室、物理治療及職業治療室與小型戶外花園等，新設施將為智障人士提供更多發揮所長的空間。當日卓妮見總理馬清揚（Philip）在天台復康花園對院友栽種的植物非常感興趣，見佢用鼻子聞吓植物就知道係咩香料，以及如何配合烹調食物，原來佢都「入得廚房」。
Philip對復康花園內種植的萬壽菊、薄荷葉、芥蘭頭等等很感興趣，當佢靠近迷迭香時，就指用來烤羊架最適合，似乎對廚藝頗有研究。Philip又話，平日家人均愛食佢整嘅意粉及牛扒，好普通嘅菜式加少少香料就可以變到完全唔同晒，係精華所在，所以佢對香料特別留意。話說復康花園除咗供院友種植物外，植物仲會供院舍食用。
擴建涵蓋學院助培育人才
同場嘅副主席陳祖恒、總理楊嘉成及馮敬安則對該院院友有份參與製作的小茶點及飲品十分欣賞，大讚手勢唔錯。副主席馬陳家歡、王賢誌及馬會大董李家祥等細心聽院友解釋新設施使用方法，好似無線射頻辨識標籤（RFID），視障院友可以用安裝咗感應器的拐杖偵測沿路標籤，透過手機應用程式即時聽到語音導賞，知道眼前種咗咩新植物，相當方便。
擴建部分仲包括今年三月已經啟用的社區復康學院，主席何超蕸指現時復康服務界行業仍面對人手短缺及招聘困難問題，目前學院每月約舉辦五項訓練活動，為百多人提供臨床實習及研究機會，希望可以培育更多有關人手。
卓妮