「逆水行舟，不進則退」，呢句本來常見於小學生紀念冊嘅勉勵說話，不幸一語成讖，成為香港嘅真實寫照，講起都幾可悲。
呢，中國城市競爭力研究會日前公布嘅最新排行榜顯示，香港連續三年落後於上海，只能屈居第二。最羞家嘅係，喺最具特色旅遊城市排名方面，香港居然三十名不入，連澳門都不如，真係有咁耐風流有咁耐折墮咯。正如「東方報業民意調查」顯示，多數受訪者認為香港旅遊競爭力節節後退，面對內外挑戰，岌岌可危。
咁又難怪嘅，香港一味食老本，旅遊基建幾十年如一日，來來去去得嗰幾個景點，唔係海洋公園，就係迪士尼樂園，你唔厭，旅客都厭喇。鄰近城市就唔同嘞，除咗大量增加基建，而且頻頻出招吸客。好似珠海橫琴嘅長隆海洋王國咁吖，地方又大，種類又多，香港根本無得比；又好似就快開幕嘅上海迪士尼樂園咁吖，唔止噱頭多多，而且規模更大，設施更新，加上地利之便，勢必搶走大批內地客，香港迪士尼就算推出新景點，亦好難同人競爭。
景點不足都算嘞，香港旅遊業亂象多多，醜聞百出，更加令人避而遠之。不良商戶劏客、黑的濫收車資等等，呢啲都仲係小事，前排發生旅客被毆斃慘劇，令香港臭名遠揚，旅客聽到都怕怕喇，仲點會山長水遠來港貼錢買難受吖。正如大部分受訪者話齋，連串醜聞令香港旅遊形象大打折扣，加上激進組織一時「驅蝗」，一時「鳩嗚」，「好客之都」形象蕩然無存，而港府又闊佬懶理，旅遊業想唔入寒冬都幾難。
唔係講笑o架，十一月訪港旅客下跌逾一成，已經係連續六個月下跌，其中內地客減少超過一成半，持「一簽多行」嘅內地客更急跌近四成添。唔怪得業界人士紛紛睇淡今個聖誕節嘅市道，焗住要割價救亡喇。
正所謂，人衰行路打倒褪，近年香港好似撞邪咁，頭頭碰着黑，何止旅遊業入寒冬，整體競爭力更加跌跌不休。尤其係反對派政客無事生非，阻頭阻勢，成立一個創科局都拖足三年，連版權修訂條例都搞到滿城風雨，香港點可能有運行吖。反觀深圳就唔同嘞，人哋埋頭苦幹，全心全意發展經濟，短短時間就由低端製造業基地轉型為高新產業中心，唔止整體競爭力亦步亦趨，生產總值亦即將後來居上，你話香港醜唔醜吖。
講到底，香港淪落到咁嘅地步，完全係咎由自取，與人無尤。港產官僚再不思進取，遲早連貴州及甘肅等貧困地區都爬頭，到時唔慌唔抬棺材甩褲，失禮死人咯！