政情：阿基拒言退 擬轉區出選
今屆區議會選舉有多名資深議員落敗，當中包括民協嘅馮檢基（阿基），令佢冇得再循超級區議會界別角逐連任立法會議員。不過現年已六十二歲嘅佢，尋日同記者茶敍時仍拒絕言退，強調自己「不論健康、精神、意志都覺得政治生命未完，會搵個一擊即中的地區出擊，否則議會工作就會完！」
至於轉去邊個直選選區，阿基聲言唔會食回頭草重返九西「老巢」出選，以免同剛重新當選區議員嘅老戰友譚國僑爭食，當中以新界西同九龍東機會較大，因為民協喺嗰兩區都有一定樁腳。
除咗阿基同譚國僑，民協亦計劃再戰超級議席，「民協現有十八位區議員，有入場券（十五名區議員提名）唔去（選），交代唔到」，人選會從三至四名中生代及新生代中挑選，另外亦不排除派多一人出戰地方直選，即一共最多派四人。問佢搵新人選超級係咪送死？佢就話來屆超級選舉，建制派同其他泛民都可能會派新人，佢哋未必會蝕底喎。