政情：財爺Greg蘇 恐一鑊熟
喺泛民全力反對同拉布、建制派懶懶閒唔幫拖之下，俗稱「網絡廿三條」嘅《二○一四年版權（修訂）條例草案》形勢危殆，就連之前漫不經心、後知後覺嘅商務及經濟發展局局長蘇錦樑（Greg蘇），日前都終於知驚取消外訪，留港救亡。不過，Greg蘇嘅上司財政司司長曾俊華（鬍鬚曾），就仍然對今次危機闊佬懶理，尋日仲有閒情逸致寫網誌，大談日前訪京時感受到嘅霧霾「焦味」。版權草案爭議再咁拖落去，遲早會燒埋明年初嘅預算案，隨時搞到政府又再出現財政危機，唔知鬍鬚曾返到香港後，聞唔聞到呢陣（火羅）味。
網談訪京行 不提草案爭議
版權草案原定上周三喺立法會恢復二讀，點知未開波已經流會，押後至本周再戰。不過，建制派日前已明言唔會編製更表防止再流會，但Greg蘇尋日仍話唔會特別擔心，相信班議員會做工作喎，真係唔知佢係處變不驚，定係根本唔識反應。
一般情況而言，某件事超過某位局長嘅能力範圍，相關嘅司長就應該出手介入。就版權法同Greg蘇而言，理應係鬍鬚曾出手嘅時候，但係至今都唔見佢有任何動作或幫拖嘅意圖。尋日佢寫網誌講述訪京行程，亦只係掛住講「一帶一路」同霧霾，話「甫踏出機艙，立時感到京城的濃濃寒意，也察覺到霧霾下空氣中的微微焦味。」隻字未提喺香港就嚟燒燶晒嘅版權草案。
泛民最近喺立法會發動全方位拉布戰，大會、財委會、工務小組無一幸免，其中版權草案只要流多次會，就足以拖過年。聖誕新年假完咗之後，就緊接有一月嘅施政報告、二月嘅農曆年假同預算案、三月嘅預算案特別財委會同北京人大政協兩會、到四月又有復活節假，真正開到立法會大會嘅時間唔多，隨時未拖死版權草案就先拖死預算案，遲早都會燒到鬍鬚曾，再唔救火就好快一鑊熟！