中環出更：立會啡色恐怖 政界自危
立法會發生「屎」上最恐怖嘅事，會計界議員梁繼昌（Kenneth）開開吓會都「瀨嘢」中糞，搞到一褲都係，令政界掀起一場「啡色恐怖」，人心惶惶。卓妮尋日喺馬場見到多名政界人士，大家都話一日未揪出元兇，以後坐低前要睇清睇楚。不過，亦有議員質疑今次「藏糞案」嘅元兇就係Kenneth本人，唔通想話佢無喇喇自己「𢲡屎上身」？真係愈講愈恐怖，愈諗愈惡心！
飲食界張宇人（Tommy）同卓妮分析，Kenneth當日坐嗰個位市民通常坐唔到，而秘書處職員都好高水準，相信唔係佢哋做，估計好可能Kenneth早已喺街上踩屎，之後蹺腳揩到會議室枱底，條牛仔褲再揩到枱底啲屎。Tommy仲笑言，如果Kenneth姓周就知咩事，因為「周身屎」！同場嘅前港大校委會主席梁智鴻話，Kenneth中嘅係乜，其實好易驗，佢認為事件唔係惡作劇，而係有人唔小心整到啫。
曾偉雄：或涉反社會行為
商界議員廖長江覺得事件相當懸疑，以後開會都「小心駛得萬年船」。紡織及製衣界議員鍾國斌就話，開會前唔止會睇清楚，仲會用個鼻去索吓，「睇唔到都索到吖嘛」。律政司司長袁國強亦話，以後去立法會開會坐低之前都會望吓先，但相信「有第一次唔會咁快有第二次啩」。警務處前處長曾偉雄則形容事件雖然不涉暴力，但可能係一種「反社會行為」，呼籲各界小心，做任何嘢之前都要先諗清楚。
有秘書處職員就認為，涉事會議室一般市民同記者都好難入到去，不排除係立法會嘅外判工所為，因為過往曾有外判工被發現有怪異行為，整污糟立法會洗手間內部，「手法」同今次事故相似。但由於會議室只會喺開會時開閉路電視，即使走廊外影到某人喺「案發」前入咗去，都好難證實係佢做，「隨時要驗DNA先查到」。睇嚟班議員有排驚啦！
卓妮