有人話，今日嘅香港好似逆水行舟咁，不進則退。其實，香港唔係樣樣都後退嘅，有一樣嘢啱啱相反，好似坐火箭咁不停飆升，係乜？咪就係生活成本囉。
最新調查顯示，全球外派僱員生活費最高嘅城市當中，香港排行第九，比去年大幅上升十七位；如果只計算亞洲城市，香港更加排第三添，遠遠高過日本東京、韓國釜山及新加坡。呢項調查涵蓋全球逾四百五十個城市，根據食物、衣服、娛樂等消費價格，定出海外工作人員嘅生活指數。香港近年競爭力不斷畀周邊地區爬頭，唯獨生活成本節節上升，都咪話唔諷刺。
點解本港生活指數排名咁高？調查機構係咁講嘅，喺聯繫匯率之下，港元跟隨美元走勢強勁，係導致貨品及服務價格提高嘅原因。冇錯，港元跟隨美元升值，而日圓及歐羅等貨幣就貶值，此消彼長之下，香港物價被扯高一啲都唔出奇。不過咁，匯率變動對物價影響始終有限，本港生活負擔沉重，已經唔係一朝一夕嘅事，並非淨係匯率因素咁簡單。歸根究柢，香港百物騰貴，最主要嘅根源係樓價租金高企，商舖租金高到冇朋友，貨品同服務價格水漲船高，連買個麵包都貴過人，生活成本有乜法子唔節節上升吖。
唔使問阿貴，營商成本百上加斤，外派員工生活指數飆升，勢必削弱本港競爭力。香港話就話擁有唔少優勢，好似根基雄厚、法治良好、國際網絡完善等等，可惜時移勢易，早就今非昔比咯。尤其係經過舊年嘅佔領之亂，法治招牌搖搖欲墜，強項變弱項。加上內地不斷加快改革開放，對外接軌日趨完善，香港窗口角色漸漸淡化，已可有可無。所以話，流水落花春去也，香港隱憂重重，一方面優勢不斷流失，一方面生活及營商成本不斷上升，再咁落去，仲點樣同人競爭吖？
話時話，喺高地價、高樓價、高租金嘅「三高」政策之下，「居不易」嘅點止外國員工。今時今日，衣食住行樣樣難，市民嘅生活擔子重如千斤，好多人就算唔生仔女，都一樣斷擔挑嘅咋。最可悲嘅係，好多基層家庭被迫蝸居劏房，搞到港式貧民窟遍地開花，連雞欄、豬欄、貨櫃都大把人住，成為香港嘅恥辱。
古人話，治病治病源。本港經濟及民生問題千頭萬緒，三高政策就係主要根源，呢個問題解決唔到，講乜都無用。生活成本沉重，外國員工固然「居不易」，普羅市民更加叫苦連天，當局與其絞盡腦汁為公屋三年上樓目標篤數，不如認真諗吓點樣解決三高問題仲好喇！