「三年上樓，房署呃人」，申訴專員踢爆房屋署「篤數」，刻意製造三年可上樓嘅假象，唉！紙又點包得住火啊，本港住屋問題嚴峻，劏房遍地開花，基層等上樓固然怨恨連連，而所謂「中產」，無殼蝸牛面對貴租金，一樣捱到隻狗咁，香港表面繁榮，實際民生多艱，政府扶貧乏力，市民等上樓又望到頸長，試問又有幾多人可以學關雲長大哥咁刮骨療毒——全無痛苦之色啊！
ＣＹ曾經咬牙切齒咁話：有決心、有信心、有能力逐步扭轉房屋供求失衡問題，所謂「民生無小事」，所謂房屋問題係「重中之重」，冇錯，家陣唔慌唔重，公屋輪候申請宗數已逼近二十九萬大關，一般申請人平均輪候時間實際已長達五年，「三年上樓」已變成姑妄言之姑聽之，豆棚瓜架雨如絲的「秋墳鬼唱詩」，政府再話有決心搞好「房事」，真係搵鬼信咯！
梁振英政府嘅「決心、信心、能力」恐怕已隨流水去，頂多又再來一次「檢討」，反正特區政府不少政策，除了房屋，還有教育、強積金、大型基建、醫療、全民退保、電子道路收費計劃……無不在檢討又檢討中，一個又一個的報告中翻來覆去的蹉跎歲月，最終一事無成，空餘一襟夕陽晚照！
其實，「檢討」一事，古已有之，在翰林院下有「檢討」一職，只為反省總結，並無貶意。只是近年來，官僚濫用檢討，檢討一詞成為下台階的遁詞，變成避重就輕、避實就虛嘅一門「藝術」，總之，一唔對路，就話要時間檢討，ＴＳＡ是否廢除，吳得掂話要時間檢討就是最佳示範！如今公屋政策失調，政府睇怕又要「檢討」一番，之不過巧婦難為無米之炊，加快建公屋口惠而實不至，無關痛癢的檢討、報告——面前依然死結一個！房屋政策，依老朽看，已是落油鍋的蝦米——蹦不了啦！