政情：公民講場：版權例未過 非洲難出「蘇」

《2014年版權（修訂）條例草案》出師不利，被泛民主派同網民鬧爆之餘，未審議已經流會收場，而負責草案嘅商務及經濟發展局局長蘇錦樑（Greg蘇）又被批評懶懶閒唔做嘢，真係輸人又輸陣。可能Greg蘇自知一不留神隨時孭鑊，喜愛外訪嘅佢尋日急急喺社交網站貼文，宣布為咗處理版權條例立法工作，決定取消下周一到非洲肯尼亞出席世界貿易組織（WTO）第十次部長級會議，希望把握時間解釋條例喎。Greg蘇嘅黨友、立法會議員葛珮帆（EQ）早前被指掛住去非洲保護大象，搞到連沙田區議會議席都冇埋，唔知Greg蘇係咪有感前車可鑑，急急取消外訪補鑊呢？