政情：戴健文下月退休 轉戰港大
香港電台首長級又有變動！紅褲子出身的副廣播處長（節目）戴健文，下月六日退休，港台尋日發出內部通告，公布將會由助理廣播處長（電台及節目策劃）廖麗怡（Lisa）接任其位置。
廖麗怡接任副廣播處長
據聞港台內部已陸續餞別戴健文，但他退休後並唔係乜都唔做，而係會轉去香港大學，皆因佢係代表畢業生議會委員加入港大做校董，早前又報名競逐校委空缺，由於佢係唯一候選人，所以尋日起已成為港大校委喇。港大校委會近年爭議不斷，睇嚟佢退休生活仲忙過喺港台打工。
講番Lisa，其實佢都算係坐咗「白金升降機」，此話何解？其實佢只係去年底接任退休嘅周偉材，擔任助理廣播處長，坐咗呢個位一年多少少，就再升官，真係「命好、Timing（時機）好」。至於Lisa個位，就係由曾經製作及主持《千禧年代》、《自由風自由phone》等節目嘅總監（電台）陳耀華接任，而陳耀華個位就係由同樣擔任過上述兩個節目主持、現任數碼聲音廣播總監區麗雅接任，唔使再搵人空降入港台喇。