政情：火警演習 立會僅10議員「生還」
《2014年版權（修訂）條例草案》呢頭未審議就流會，嗰頭立法會示威區垃圾桶又爆炸，真係要提防吓，咁啱立法會尋日舉行定期火警演習，可惜建制、泛民議員都懶懶閒、慢慢行，最後得十個議員成功「逃生」。
葉國謙排包尾「冇壓力」
立法會大樓火警鐘一響，最先抵達添馬公園集合點嘅有曾鈺成同陳偉業（大舊），其後陳家洛、譚耀宗等人陸續抵達。可能星期三流會後，尋日朝早唔使續會，又未夠鐘開財務委員會，所以大樓入面冇咩議員，平日開會成日要求點人數「拉布」嘅大舊亦都開玩笑話唔夠法定人數，要求曾鈺成宣布火警演習「無效」。曾鈺成對於今次「流會」冇再黑面，笑騎騎話有幾十人失咗蹤喎。
今次演習總共用咗十分鐘三十秒，有五百三十三人到集合點。其中葉國謙喺議員當中排包尾，唔驚走遲一步「葬身火海」咩？阿謙解釋話演習啫，冇咁大心理壓力喎，真係唔識死。