中環出更：外訪唔想加會 大舊蔣麗芸互寸
立法會議員經常要公務外訪或到外地進行考察，立法會發展事務委員會就計劃於明年三月二十至廿三日前往新加坡，考察當地開拓供水來源、發展海水化淡及再造用水的經驗，暫時有八位議員參加。
大數對方不是
立法會內務委員會尋日開會討論有關外訪事宜，議員陳偉業（大舊）要求內委會主席梁君彥與各委員會主席達成「君子協議」，在議員外訪期間不要加會，結果與民建聯議員蔣麗芸（Ann）互寸。
阿Ann批評，不能因為議員旅行、考察、放假就不准加會，更叫大舊呢啲不負責任嘅說話要三思後再講。大舊就反駁話，可能有啲議員不知何謂公務及私利，習慣以公權謀私利，外訪當旅行，公私不分。
大舊又話，佢係咪報名參加外訪，係要視乎立法會是否加會，因為現時財委會及工務小組委員會都經常加會，「如果報了名加會會好麻煩」，所以先小人後君子，囑梁君彥與委員會主席先作君子協定，如議員外訪就不加會。
其實，如果大舊等激進泛民主派議員唔係經常「拉布」，令大量議程積壓，各委員會又何需經常加會呢？
卓妮