屋漏偏逢連夜雨，本港旅遊及零售業步入嚴冬，聖誕新年旺季寒風四起，偏偏周邊地區頻頻出招吸客，香港雪上加霜，想唔食穀種都幾難。
好似日本咁吖，繼舊年十月擴大旅客購物退稅優惠，最近又計劃加碼，旅客購物由以往滿一萬日圓可以退稅，進一步放寬至五千日圓，而且退稅範圍由高價商品擴大到工藝品等小額商品。南韓亦唔執輸，明年起將免稅範圍擴展到市內小店，旅客唔使喺機場排隊退稅。日韓輪流出招，而香港就一味等運到，簡直相形見絀。「東方報業民意調查」顯示，大部分受訪者擔心周邊地區搶走香港旅客，港府不思進取，旅遊業遲早無以為繼。
唔係杞人憂天（o架），旅遊業不景拖累零售、酒店、飲食等相關行業，市面水盡鵝飛，旺區吉舖處處，有商場主動減租一半都冇人吼；酒店業更加係水深火熱，以往係人滿為患，家陣就獨守空房，今年入住率比去年下跌一成有多，都咪話唔大鑊。
面對空前險峻嘅形勢，業界叫苦連天，而港府依然滋油淡定，大有「不管風吹浪打，勝似閑庭信步」嘅架勢。咁多年來，港府淨係識花錢宣傳，話就話推廣旅遊，其實係例牌貨色，姿勢大過實際，錢就使咗唔少，旅客不增反減，你話係咪冤枉吖。
所以話，逆水行舟，不進則退。香港作為國際城市，中西薈萃，交通發達，條件本來唔錯，可惜一直靠食老本，來來去去都係嗰幾個景點，你唔厭，旅客都厭喇。加上激進組織無事生非，搞到七國咁亂，係人都怕怕。家陣世界各地爭相吸納中國旅客，唯獨香港將財神當瘟神，講都冇人信。唔少受訪者擔心再咁落去，本港旅遊業遲早玩完，絕對唔係危言聳聽。
其實，好早之前已經有人提議設立邊境購物城，一來分流旅客，二來刺激消費。可惜當局拖拖拉拉，籌備逾年嘅邊境購物城原定明年春節開張，結果要延到明年五月，到時肥水早已流入別人田，邊境購物城究竟有冇旅客幫襯，真係令人懷疑。正如上述調查顯示，多數受訪者批評港府錯失時機，未能及時提升接待能力。
始終都係古人講得啱，天予弗取，反受其咎。香港有錢唔識賺，搞到蜑家雞見水，只能怪自己唔爭氣。咪話功夫茶唔提醒，家陣外圍環境唔係咁好，內地經濟面臨下行壓力，加上美國就快加息，可以講係危機四伏，港府繼續不思進取，唔止旅遊及零售業唔掂，其他行業亦唔會有好日子過，隨時出現大規模倒閉及裁員潮，到時出招都救唔番咯！