將男女廁衞生設施比例由現時1:1更改為1:1.5至1.6嘅新法例，將於下周一開始生效。發展局局長陳茂波尋日喺網誌撰文，向長期喺商場女廁門外大排長龍嘅香港女性耍冧，指今次新例讓女士們「久等了」，希望今後佢哋可以去得「更暢『快』」。不過，新例只適用於新建築物或進行大幅改建嘅現有建築物，都唔知要等幾多十年，先至可以全港所有商場、食肆同電影院都加建女廁，香港女士們都係要繼續「等」同「忍」落去！
