今屆區議會選舉泛民於沙田區取得好成績，其中數名現任獨立泛民區議員麥潤培、衛慶祥及容溟舟，以及兩名「傘兵」黃學禮及黎梓恩都順利連任或當選，以上五人都有一個共同特色，就是全部都先後退過黨，麥潤培尋日於社交網站更宣布，五人將合組「新退黨同盟」，聲言要正式註冊同公開招收黨員！
資料顯示，麥潤培及衛慶祥退出過民主黨；容溟舟先退民主黨、後退新同盟；黃學禮及黎梓恩就分別退出了「傘兵組織」青年新政及沙田新幹線，佢哋擬合組嘅「新退黨同盟」，黨徽係一個人形公仔跑緊出一道門，好似緊急出口標誌，而口號則為「退一步，康莊大道」。
然而一切講到似層層，麥潤培接受查詢時承認，註冊組黨只係「搞噱頭」，希望吸引年輕人注意，成為佢哋地區義工。
佢又話，歡迎任何退黨人士加盟，再三強調一定唔會好似民主黨新界東支部咁，搞小圈子投票亂踢人出黨，明寸民主黨之前將佢踢出黨。