政情：懶理黨大會 李漢奸密訪肥佬黎
民主黨（白鴿黨）昨午舉行黨員大會討論來年立法會選舉部署，咁重要嘅會議，居然唔見該黨創黨主席、外號「李漢奸」嘅李柱銘現身。但相隔短短個多小時後，我哋就見到李漢奸現身壹傳媒集團前主席黎智英嘅寓所，明顯佢認為與「金主」密會，緊要過自己一手創立嘅白鴿黨。
頻頻「飯敍」 又想攪局
昨午約五時五十分，先後有一名年長外籍男士同一名中年華裔女子，自行坐的士抵達黎宅，之後再見到李漢奸同太太亦自行駕車到場，估計係嚟與黎智英等人一同「飯敍」。
晚飯喺近八時結束後，李漢奸用私家車一次過車晒幾位來賓離開，期間聽到黎智英喺大門送客嘅聲音，但係就見唔到佢個樣，非常神秘。
其實李漢奸喺上周五先啱啱到訪過黎宅，當時仲有另一「搞事四人幫」成員、天主教香港教區前主教陳日君。相隔兩日又嚟飯敍，既秘密且頻密，擺明又想密謀作反。