中環出更：「佔中輔警」戴綠帽鬧長毛
社民連立法會議員梁國雄（長毛），前晚喺旺角畀反對「網絡23條」嘅激進人士包圍辱罵成粒鐘，最後要由警員護送離場，認真失威。事後有人認出，其中一名頭戴綠色鴨嘴帽、拉低口罩、爆晒粗指罵長毛嘅青年男子，原來正係在佔中期間被揭身兼輔警嘅佔領人士Joe Yeung楊逸朗！
Joe Yeung在事發時自稱樹仁大學學生會候任會長，但大家起初都唔係好信。其後有人認出佢係「佔中輔警」，再喺網上一查，先發現佢原來真係喺樹仁讀緊歷史系四年班，並剛以「仁本」內閣名義當選仁大學生會會長。而「仁本」全名為「樹仁本土」，立場係點大家明喇。
長毛叫後生仔「用腦」
適逢尋晚係社民連成立九周年黨慶，長毛喺會場同我哋講，自己唔認得Joe Yeung，但係就批評當晚「老屈」佢無承諾拉布嘅「四眼哥哥」鄭錦滿忘恩負義，指鄭早前坐監時自己曾去探監，對方話冇請律師搞保釋，佢又立即搵人幫手搞。問及事件係咪顯示佢真係老咗，係時候讓位畀啲後生仔？佢就話班後生仔睇落體力都唔係好佢好多，並叫對方用多啲腦，以及鬧人時唔好鬧埋人哋阿媽喎。
卓妮