中環出更：靚蟹如雲 「車」酒相伴
浙江省同鄉會聯合會（浙聯會）青委早前喺會所浙江軒舉行紹興酒講座暨大閘蟹宴，唔少愛蟹一族去擦餐飽。中華總商會青委主席黃楚恒（Stanley）及太太陳嘉妮（Kelly）都有到場。卓妮見Kelly腹大便便，真係被佢嚇咗一跳，事關年幾前佢先至生咗一對孖仔，加埋已有一女三仔，唔通咁快又有喜？
黃楚恒六年抱五「超標」
Stanley笑笑口話，今次生完真係要收工，事關計埋肚中BB仔，共有五名子女，六年抱五，認真超晒標。福建人鍾意多子多孫，Stanley媽媽、中總婦女委員會副主席黃周娟娟一定好開心喇，點知Stanley笑稱，「媽咪抱孫抱到麻木晒！」。有添丁之喜嘅仲有浙聯會青委主席顧偉誠（David）。幾個月前David升呢做爸爸，見佢講起個仔就笑不停，旁人都感受到佢嘅喜悅。
當晚浙聯會青委前主席兼紹興旅港同鄉會會長車弘健（Anthony）一早到場打點，仲帶埋多款珍藏紹興酒與大家分甘同味。紹興酒即係黃酒，與啤酒及葡萄酒並列為世界三大古酒，Anthony話，雖然台灣及日本都有紹興酒，但係浙江紹興因氣候及水源唔同，所以特別香醇好味，同大閘蟹更加係絕配。
Anthony仲請埋一班識飲識食名家嚟品嘗，包括旅遊作家項明生（James），James自爆亦係浙江人，但今次係首次到浙江軒食嘢，唔知Anthony會唔會游說佢加入浙聯大家庭呢？
卓妮