今時今日，恐怖主義陰影無處不在，恐怖襲擊無日無之，搞到風聲鶴唳，防不勝防。正如武俠小說話齋，最安全嘅地方顯然就係最危險嘅地方！
嗱，泰國政府證實接獲俄羅斯聯邦安全局通報，有多名極端組織「伊斯蘭國」成員已經由敍利亞進入當地，分別潛伏曼谷、芭堤雅同布吉等旅遊熱點，準備進行針對旅客嘅恐怖襲擊，泰國當局唔敢怠慢，隨即宣布全國戒備。恐怖分子血腥殘暴，上月中血洗巴黎，跟住襲擊馬里，然後輪到美國加州出事，依家泰國又受到威脅，你話嘞，世界有邊個地方安全吖？
面對來勢洶洶嘅恐襲威脅，港府聲稱現時未有情報顯示香港受到威脅，風險評估仍然維持中度，暫時未有需要因應泰國情況而升級咁話。冇錯，香港向來唔係恐怖分子嘅主要目標，比起歐美或中東等地區，風險相對較低，不過咁喎，以前安全唔代表今日亦安全，以前唔係襲擊目標唔代表今日亦能夠獨善其身。好似中國大陸同台灣咁吖，雙雙被伊斯蘭國列為襲擊目標，香港又點能夠保證安全呢？
唔係杞人憂天（o架），日本媒體引述專家指出，伊斯蘭國嘅勢力已經蔓延至亞洲，好有可能選擇喺聖誕節犯案，甚至可能喺中國進行大規模恐襲添。寧可信其有，不可信其無，近年疆獨組織不斷喺內地搞事，恐怖襲擊此起彼落，加上依家同伊斯蘭國遙相呼應，更加猖狂喇。香港係中國嘅特別行政區，又係國際都會，極端組織選擇向香港落手，絕對唔係冇可能（o架）。尤其係聖誕節就快到，出入境人流大增，萬一畀恐怖分子乘虛而入，咁就大鑊咯。
最得人驚嘅係，港府一向中門大開，對假難民來者不拒，更加危機四伏。呢，聚居香港嘅所謂酷刑聲請者愈來愈多，龍蛇混雜，已成為公共安全嘅一大隱患。早前法國發生恐襲慘劇，恐怖分子就係假扮難民潛入當地，裏應外合，港府再唔吸取教訓，堵塞漏洞，遲早爆大鑊嘅咋。
一句講晒，恐襲無疆界，香港絕對唔係世外桃源，當局千祈唔好大安旨意吖。係人都知，本港機場出名保安鬆懈，漏洞百出，過去多次被傳媒踢爆，不法之徒取易不取難，機場好似無掩雞籠咁，等於開門揖盜嘅咋。
講到底，市民最緊要識得自己執生。古人話君子不立危牆之下，早前泰國發生暴力恐襲，有港人成為犧牲品，依家泰國再拉響恐襲警報，大家更加要自求多福。小心駛得萬年船，面對無處不在嘅恐襲陰霾，港府同市民都要打醒十二分精神吖！