高鐵工程爆出嚴重延誤、超支，早幾日仲宣布大玩財技，借錢派息畀政府，但政府即刻嘔番出嚟填超支黑洞，無異於全民為超支埋單。運輸及房屋局局長張炳良尋日出席電台節目時，再次話會承擔政治責任。心水清嘅市民應該對呢句說話不感陌生，因為張炳良講咗N次，但係一啲都冇付諸行動嘅迹象，若果佢真係要負上政治責任，鉛水風波都夠佢落台幾次喇！拖吓拖吓，現屆政府任期只剩年半，不免令人懷疑張炳良有冇勇氣及誠意承擔責任，抑或只係大隻講，擋吓啲穿心箭就算？
