區議會選舉議席增減對各黨派喺明年立法會選舉嘅選情有關鍵影響，其中喺區選失去老巢馬坑涌及黃大仙池彩兩席嘅工聯會（工記），據聞明年嘅選情都好黯淡，最壞嘅情況係回復當年立法會得三席嘅局面。
工記規定勞工界議席只可做一屆，所以佢哋兩名勞工界議員郭偉強同鄧家彪明年都有意轉戰直選。原本打算出選港島區嘅郭偉強隨着當區議席減少，似乎已轉戰九龍西，但憑佢嘅知名度，要喺九龍西取一席真係有難度。打算轉戰新界東嘅鄧家彪喺建制派爭崩頭嘅情況下加入混戰，贏面已不大，新界東補選預料會為選情再添變數。
工記九龍東議員黃國健嘅選情都相當嚴峻，由於工記九龍東嘅票源主要係年長一群，但四年過去，好多支持佢哋嘅選民可能已離世，加上盛傳民建聯九龍東議員陳鑑林將交棒畀佢哋觀塘區議員柯創盛，換言之唔一定會再配足票畀佢，選情自然危危乎。另外，聞說工記新界西立法會議員麥美娟同地區樁腳關係麻麻，下屆唔知仲企唔企得穩。數數下，工記較為穩妥嘅只有或循超級議席出選嘅王國興，睇嚟工記真係要急起直追喇。