中環出更：洋漢鬧阻路 嚇窒大劉
近日天氣轉涼，且不時落微雨，行步路都要小心啲。華人置業前主席劉鑾雄（大劉）尋日如常到灣仔富豪飯堂用膳，但因為當時落雨，保鏢們一擁而上為佢開遮，阻擋一名外籍男子向前行。呢名外籍男子隨即發火，推開保鏢之餘，仲大罵「Don't ever do that」，大劉當堂嚇到呆咗。其實食餐飯都搞到阻晒街，難怪途人都睇唔過眼。
食餐飯要大批保鏢「護駕」
尋日中午，大劉一行人乘坐七人車抵達灣仔富豪飯堂用膳。由於當時落住微雨，一眾保鏢大為緊張，大劉未落車已經爭相上前開遮「護駕」。大劉落車之後，幾名保鏢簇擁佢行入飯店，亦有人喺附近為佢開路，期間有一名外籍男子想向前行，但遭到阻撓，佢曾經試圖推開保鏢，放行後更大聲喝罵「Don't ever do that」，似乎係氣憤難平。
大劉見到呢個情況，即刻嚇到目瞪口呆，企喺原位唔敢亂郁。直至「目送」該名外籍男子離開，大劉先放心行入飯堂，仲不時回頭望。大劉胞妹劉玉珍等人其後分別乘車抵達飯堂，唔知大劉有無嚇到食飯都唔安樂呢？
卓妮