物競天擇，汰弱留強，呢個唔止係自然界嘅定律，教育界一樣適用。好似香港嘅副學位課程咁吖，質素參差，泥沙俱下，想唔被淘汰都幾難。
呢，教育局數字顯示，二○一六/一七學年各院校嘅自資高級文憑、副學士及學士學位課程顯著減少，多間大專院校收生人數下跌，部分自資副學位課程更加被迫停辦添。好似香港公開大學李嘉誠專業進修學院咁，下學年將會停辦五個自資副學位課程，減幅逾兩成；而即將升格大學的香港教育學院，更加全面停辦自資副學位課程，一個不留。
點解副學位課程會走向沒落呢？教育界人士係咁講，當年相關課程發展過度膨脹，而隨着文憑試考生人數近年持續減少，造成供過於求現象，加上副學位課程學費不菲、其他自資學位課程競爭激烈、學生到內地及台灣升學熱潮持續等因素，估計副學位課程終難逃被淘汰嘅命運。
即係咁，副學士由盛而衰，學費問題同市場競爭激烈固然係因素之一，但歸根究柢，副學位課程良莠不齊，認受性低，至係真正嘅致命傷。係人都知，當年港府推出副學位課程，無非想搞教育「八萬五」，營造六成學生可以升讀專上院校嘅假象，所以任由院校濫開課程，令學額出現大躍進式膨脹，由十年前嘅二千幾個，急增至現時嘅超過三萬個。問題係，由於港府放任自流，唔監唔管，副學士嘅數量同質量完全不成正比，學生浪費金錢及時間不特止，讀完課程隨時得物無所用，畢業變失業，讀書變通輸，唔少學生仲要孭一身債，成為如假包換嘅「掘頭進士」。你話嘞，港產官僚假大空，係咪誤人子弟吖。
最令人詬病嘅係，喺港府鼓勵之下，教育變成一盤生意，副學位課程淪為部分院校嘅生財工具，學生唔係學識增值，而係谷到一肚氣。最經典例子係嶺南大學旗下兩間學院曾被踢爆嚴重超收，搞到要借用毗鄰街市嘅商場做教學中心，成為教育界嘅大笑話。
咁講喇，副學位推出初期，學生同家長就話容易受騙啫，家陣過咗咁多年，邊啲課程真係可以作育英才，邊啲課程只係為咗作育錢財，再呃唔到人嘅喇，副學位課程日漸式微甚至走向窮途末路，已經係無可避免。依家最大嘅問題係，本港大專資助學額長期僧多粥少，每年均有一半合資格考生被拒諸門外，佢哋嘅出路喺邊度呢？唔報讀副學位課程又有乜嘢選擇？當年港府不負責任，搞到副學位課程亂象叢生，依家係時候補鑊喇，如果繼續闊佬懶理，遲早連你哋都被淘汰嘅咋！