立法會新界東補選二月底舉行，提名期下月就開始，剛喺區議會選舉嶄露頭角嘅「傘兵」組織青年新政就表明有意參加補選，已經去信要求公民黨（公文袋）商討，仲提出以初選形式協調派人出選。不過，公文袋一於歎慢板，有激進派指青年新政並非同路人，似乎想玩杯葛。其實補選事小，明年立法會選舉先事大，估計泛民主派係唔想助長「傘兵」聲勢，但不肯初選就似乎唔民主囉！
青年新政建議泛民舉行初選，尋晚更與公文袋會面商討，建議在新界四個區議會選區設街站，讓選民投票，但公文袋以資源及時間緊迫為由再作研究。雖然人民力量立法會議員陳偉業日前表明人力無意派人參選，但明言唔會支持「傘兵」，嫌「傘兵」連支持雙普選都唔敢寫落政綱，與泛民唔係同路人。
泛民中人認為，只要唔撞選區，喺區選支持「傘兵」都無所謂，但係立法會選舉實行比例代表制，故此會各不相讓，特別係走激進路線、票源可能會重疊嘅社民連、人民力量、熱血公民，甚至公文袋。
而今次補選，即使「傘兵」未能當選，但亦為明年立法會選舉宣傳、試水溫嘅大好機會。泛民以免助他人聲勢，滅自己威風，當然懶理初選建議，將「傘兵」撳得就撳。