律政司司長袁國強周二起缺席多項公開及官方活動，直至前日傳媒查詢先至承認入咗醫院休養，但具體係咩病又唔肯講，淨係話腸部不適，唔係大問題，毋須動手術喎，引起外界揣測，有議員更直斥政府刻意隱瞞袁國強病情。到咗尋日上午，律政司又話佢原來已經出咗院，但司長會休息埋呢個周末，到下周一先至返工。
咁究竟袁國強係因乜病入院？入咗邊間醫院？以後仲有冇手尾跟？統統到依家仲係一個謎，相當神秘鬼祟。須知佢話晒都係特區政府第四把交椅、三司之一，佢嘅病情都有唔少市民關心。眾所周知，袁國強有食開煙，又公開講過冇乜做運動，真係要小心身子呀，莫非最近搞高鐵一地兩檢太大壓力，緊張到腸痙攣？