政情：小肥張混帳 工商謀反擊

下周四舉辦聯合論壇

呢場反擊戰率先由工業總會及總商會揭開，將會喺下周四聯同中華廠商聯合會、中華總商會及地產建設商會一齊出手，再加上香港中小企聯合會、香港僱主聯合會等商界組織，聯合舉辦強積金對沖機制論壇，表達工商界對取消強積金對沖機制嘅憂慮。論壇仲請到中大前校長劉遵義、總商會常務副主席吳天海及強積金計劃管理局主席黃友嘉主講。

工商界反對將取消強積金對沖機制包括退休保障計劃諮詢範圍內，認為政府應該先做研究再作決定，而非經過六個月諮詢後就將強積金對沖機制取消。其實強積金事務一向由財經事務及庫務局負責，但局長陳家強表明難以取消對沖機制後，問題就交由小肥張負責，更有傳當局會於本月嘅扶貧委員會上公布取消強積金對沖機制結果，難怪政府會被業界批評偷換概念，將強積金視為福利政策，最終被人數佔優嘅勞方主導意見而取消強積金對沖機制。

其實當年工商界接受強積金，皆因政府承諾設立對沖機制，與長期服務金及遣散費對沖。雖然特首梁振英（CY）競選政綱表明要逐步取消強積金對沖機制，但眾所周知當時工商界並非全部支持CY，又點會肯犧牲幫CY「找數」，完成佢嘅競選承諾呢？況且CY政綱亦寫明「在訂立新法規時，要評估對中小企及小商販的經營環境帶來的影響」，工商界就執住呢一點，相信政府都幾難「搬龍門」撒賴喇！

唔排除再有激烈行動

工商界更出言「恐嚇」，指現時經濟環境差，取消強積金對沖機制就要將負擔轉嫁到消費者身上，更表明今次論壇只係頭炮，唔排除再會有激烈行動！

反觀勞工界方面，未來繼續爭取標準工時立法、劃一勞工假與公眾假期，相信勞資雙方交鋒及惡鬥將會持續，小肥張夾喺中間，肯定兩面不是人，政治炸彈唔小心處理，分分鐘隨時爆炸！