中環出更：勤做瑜伽 晶晶修身成功
都市人工作忙碌，但冇健康嘅身體做乜都事倍功半，愈來愈多人明白運動對健康嘅重要性。國寶級前跳水運動員郭晶晶自從成為人母之後，身形圓潤豐滿咗，但卓妮早前喺健康快車慈善跑步行遇到晶晶，見佢已經成功修身，回復番做運動員時嘅身形。晶晶就話，可能係同佢勤做瑜伽有關。
健康快車慈善跑步行活動於清水灣鄉村俱樂部舉行，晶晶擔任活動大使。晶晶話，佢依家經常做瑜伽同周圍去行吓，加上可能湊仔辛苦，所以清減咗。講起小朋友，唔知晶晶有冇諗住生多個？晶晶就話呢樣嘢要問吓老公霍啟剛先喇。至於佢會唔會教囝囝跳水，晶晶就話要等囝囝大個咗，有興趣先會教喎。
盧偉聰鄧忍光參加慈善跑
當日多個紀律部隊嘅首長都有出席活動，當中包括警務處處長盧偉聰（Stephen）、海關關長鄧忍光等，佢哋仲參加咗五公里名人慈善賽。原來Stephen並唔係經常跑步，反而游水同健身多啲。佢又話，雖然依家少跑步，但以前喺學堂考試時可以用九分鐘跑二千四百米，稱得上係成績驕人。
相反鄧忍光就一向都有跑步習慣，佢每日朝早都會跑四十五分鐘，仲堅持咗十年咁耐。話時話，鄧忍光接任關長職務都幾個月，佢話可以嘗試唔同範疇嘅工作都唔錯，而轉職紀律部隊後，佢都想學步操，但仲未有時間。
卓妮